上次我都有提過廚房入面有個大陸既男仔,成日有意無意咁碰撞我,後來我話左俾同事+SHAREHOUSE MATE- DICKSON知, 佢話仲有另外一個女仔都有類似既情況,亦剛剛話左俾老闆知!正當呢個星期我掙扎緊幾時同點樣講之時...有一晚係廚房,當時我同佢唔係好近,都有1個身位,佢就唔小心踩到我,我就痛到大叫左一聲,點知佢係完全冇失平衡既情況下,撲埋黎攬住左我囉!!整個情況我同事DICKSON睇到晒!,我之後都即時鬧佢,佢就好似若無其事咁行開! 呢個時候其實我都差唔多收工,不過個個都可以準時收工,我就被老闆細佬S留低,繼續完成(人地)未做完既工作, 而我正正係最嬲最唔開心既時間,你要我OT!?!
可能我既唔開心有人察覺到,廚房入面既大廚就黎開我做咩,佢一問之下,我就忍唔住流出眼淚,我就一五一十話佢知,佢安慰我之餘亦話幫我同老闆講,仲話唔會開我個名,我一聽到之後,就更加嬲!點解唔可以俾人知我俾人博懞呢?做錯既係佢,唔係我,我怕咩人知係我投訴佢呢?!呢個時間,其實有幾個同事都走黎問我做咩事唔開心.....眼淚又不停地流...(仲不地停洗緊咩...><感覺真係好慘咁!!)後來到我自己靜靜地一個人既時候,再諗點解我每一次講出黎,我都忍唔住流眼淚...講真呢D咁樣既博懞,又未至於好嚴重,不過我覺得我有被羞辱既感覺!另外一個我喊既原因,係見到同事,同屋朋友,係香港既朋友對我既支持、慰問,而流出感動既眼淚,雖然我一個人面對,但又不完全孤單的!所以我喊,唔代表我係軟弱,只係個D一直都有既孤單既情緒,一下子就湧出來><
係當晚,我都將整件事,以及以前佢做過既行為都話左俾老闆既細佬知,佢話會警告佢,同講俾老闆知,我同佢講,你要做D野去解決呢個問題,因為依家餐廳好多新黎既女仔,佢地可能都會/已經遇到呢D情況喇!!我亦同佢講,如果佢再咁對我,我就會報警!!
第二日老闆同我講,佢已經警告呢個人,如果佢再犯,佢就會炒佢...我都再重申一次,我話我係會報警囉!
呢件希望叫做告一段落,呀韜仲講左句風涼話:「有呢D經歷都好呀,經歷應該有好,亦有唔好既。」有冇搞錯呢?有邊個想要呢D經歷呀??
