係餐廳工作左2個星期,算係捱過了最難捱的時間--工作初期心裡壓力好大,尤其返上午茶市, 因為要學識賣點心,各式各樣既點心名,大中小點, 一眼關7咁睇晒成個環境,呢邊廂有客入黎,那邊廂有客要食甜品.....不過係樣樣都唔太熟習既情況下, 總會俾人鬧。可能上個星期返左好幾日茶市,開始感覺冇咁難應付,因為我都大概知道要點樣做,所以「應該」減低俾人鬧既機會!感覺算係良好,加上我希望定下一個目標,每日都用少少時間游水(冇做運動太耐,感覺太懶喇! ><),有運動令人心情愉快!
話說老闆妹妹C都曾經鬧得我好多, 不過呢幾天,佢既態度友善左不少,有D位我地都有笑笑口(其實係幾難得架, 因為佢多數係黑面架嘛)...不過我最想講既,都係老闆娘V.
事緣我係賣緊點心時,因為檯上太多食物,冇位放新點既食物,就將已食完既碟收回我既點心車,老闆娘見到之後,就鬧我賣點心時, 就唔好收碟,而當時佢既態度不至於好惡, 亦只係簡單講一句, 我應左佢之後,都將那隻碟放回車既最下層!好喇, 過左半個鐘至四十五分鐘之後,有人客要求我幫佢換碟, 我有問佢想換一隻而已, 但係佢要我換晒檯上個4隻, 咁我唯有做啦...咁又岩岩俾老闆娘見到,佢即時大聲鬧:「你做咩幫人換碟丫?洗唔洗咁好服務呀?夜晚就幫人換O者!!」我唯有答:「係個客人要求換呢幾隻碟架」老闆娘就停了一下,冇講咩..我就行開...
點知過左一陣,佢走埋黎,以極大聲極高姿態地鬧....內容大致係鬧番我做咩又要賣野,又收碟...(下刪百字)又話咩佢唔係針對我呀...(係呢大約幾分鐘既責備入面,除左開頭我有留心認真聽,我發現我後來都唔知佢講緊咩..真係左耳入,右耳出! ^^)正係呢個時候,妹妹C見到我俾人'JER'爆, 唔知佢係有心幫我降圍, 定又真係咁岩有客要甜品, 佢就叫我出甜品車, 咁我就即刻頭都唔回,行左去甜品車個邊, 老闆娘就唯有停止佢既訓話...
從呢件事,我總結到--老闆娘係唔鍾意人頂咀,即使係事實~佢一覺得你意圖反駁, 佢就會搵十萬樣無關痛癢既事去話你,亦好多時係佢只睇到事情既其中一部分,就狠狠地判斷我(地)做錯,不斷以佢自以為岩晒既訓話式責備轟炸我(地),而當佢發現佢鬧錯人既時候,佢都係會跌落地拿番JA沙!!!
雖然分別有幾個同事都叫我唔洗理佢,當佢話你既時間,點頭'係係係',佢就唔會講咁耐,鬧咁甘,但係我想講,如果我真有做錯既, 你話我係可以理解;不過如果你一面之詞去話我,我只係想講俾你知,我點解會咁做,係事實,亦唔算係頂咀反駁,我覺得我冇錯!
從呢份工作/呢位老闆娘,對我都有D體會、反省
當侍應工作,總有比較厭惡既時候,SET檯執檯,有時覺得工作冇咩意義...;我頓時覺得做老師呢種職業,好有意義,點去教學生去做人,做事!!
老闆娘責罵人既方式,用詞都令我反省,當我做老師既時候,有冇曾經片面地斷定學生既對錯,亦冇了解學生既狀況就下定論,判斷佢地(學生)做錯呢?又有否責備學生時,用詞字眼太過份呢?對學生既影響又可以好深遠?!我都要好好學習去明白學生、明白佢地既難處、去幫助佢地學習做人做事, 而唔單只責備不正確的地方。番到香港後,我真要好好記住!
工作雖有苦有怒,反省體會倒是深刻的!
