Nach guet 66 Tag underwegs han i denn doch endli mal e Beach no vo nächem gseh. Wobi go plantsche bin i eigentlich überhaupt nie. Ar Tonsai/Railey Beach isch vor allem chlettere agseit gsi - vo de Felse isch d Ussicht au viel besser als usem Wasser. S isch zwar ganz schön warm, aber ich cha ja nid raabeschwarz heicho, also isch de ganz Tag a de Beach brutzle nid dine. D Andrea isch denn am letschte Mittwuch usem Schwiizer Winter acho. Nebed ässe natürli, hämer d Täg mit paddle oder hike verbracht.
Am Sunntig simmer mit öppe 500 anderne Winterflüchtling ufeme eng bepackte Boot nach Phi Phi übergsidlet. S Programm isch ähnlich blibe: mit em Kayak bi Wind und Welle um Phi Phi Don umepaddle, i de Hügle und Steine vo de Insle umechraxle oder wieder mit em Kayak nach und um Phi Phi Ley. Inklusive eme Stop i de Maya Bay (wo de Film The Beach dräht worde isch). Bim Schnorchle hämmer tatsächlich e ganzi Bandi Blacktip Reef Sharks chöne agügsle. Eigentlich es Wunder bi dem Zirkus i dere Bucht.
Morn gaht's denn wiiter nach Bangkok und Cambodia, i de Hoffnig, dass i mi wiiterhin erfolgriich vor de Christchindli chan verstecke. Wünsch a dere Stell allne schöne Festtag und es paar relaxti Täg.
